Balakanda Sarga 25 – bālakāṇḍa pañcaviṁśaḥ sargaḥ
|| tāṭakāvr̥ttāntaḥ ||
atha tasyāpramēyasya munērvacanamuttamam |
śrutvā puruṣaśārdūlaḥ pratyuvāca śubhāṁ giram || 1 ||
alpavīryā yadā yakṣāḥ śrūyantē munipuṅgava |
kathaṁ nāgasahasrasya dhārayatyabalā balam || 2 ||
tasya tadvacanaṁ śrutvā rāghavasya mahātmanaḥ |
[* harṣayan ślakṣṇayā vācā salakṣmaṇamarindamam | *]
viśvāmitrō:’bravīdvākyaṁ śr̥ṇu yēna balōttarā || 3 ||
varadānakr̥taṁ vīryaṁ dhārayatyabalā balam |
pūrvamāsīnmahāyakṣaḥ sukēturnāma vīryavān || 4 ||
anapatyaḥ śubhācāraḥ sa ca tēpē mahattapaḥ |
pitāmahastu suprītastasya yakṣapatēstadā || 5 ||
kanyāratnaṁ dadau rāma tāṭakāṁ nāma nāmataḥ |
balaṁ nāgasahasrasya dadau cāsyāḥ pitāmahaḥ || 6 ||
na tvēva putraṁ yakṣāya dadau brahmā mahāyaśāḥ |
tāṁ tu jātāṁ vivardhantīṁ rūpayauvanaśālinīm || 7 ||
jambhaputrāya sundāya dadau bhāryāṁ yaśasvinīm |
kasyacittvatha kālasya yakṣī putraṁ vyajāyata || 8 ||
mārīcaṁ nāma durdharṣaṁ yaḥ śāpādrākṣasō:’bhavat |
sundē tu nihatē rāma sāgastyaṁ munipuṅgavam || 9 ||
tāṭakā saha putrēṇa pradharṣayitumicchati |
bhakṣārthaṁ jātasaṁrambhā garjantī sā:’bhyadhāvata || 10 ||
āpatantīṁ tu tāṁ dr̥ṣṭvā agastyō bhagavānr̥ṣiḥ |
rākṣasatvaṁ bhajasvēti mārīcaṁ vyājahāra saḥ || 11 ||
agastyaḥ paramakruddhastāṭakāmapi śaptavān |
puruṣādī mahāyakṣī virūpā vikr̥tānanā || 12 ||
idaṁ rūpaṁ vihāyātha dāruṇaṁ rūpamastu tē |
saiṣā śāpakr̥tāmarṣā tāṭakā krōdhamūrchitā || 13 ||
dēśamutsādayatyēnamagastyacaritaṁ śubham |
ēnāṁ rāghava durvr̥ttāṁ yakṣīṁ paramadāruṇām || 14 ||
gōbrāhmaṇahitārthāya jahi duṣṭaparākramām |
na hyēnāṁ śāpasaṁspr̥ṣṭāṁ kaścidutsahatē pumān || 15 ||
nihantuṁ triṣu lōkēṣu tvāmr̥tē raghunandana |
na hi tē strīvadhakr̥tē ghr̥ṇā kāryā narōttama || 16 ||
cāturvarṇyahitārthāya kartavyaṁ rājasūnunā |
nr̥śaṁsamanr̥śaṁsaṁ vā prajārakṣaṇakāraṇāt || 17 ||
pātakaṁ vā sadōṣaṁ vā kartavyaṁ rakṣatā sadā |
rājyabhāraniyuktānāmēṣa dharmaḥ sanātanaḥ || 18 ||
adharmyāṁ jahi kākutstha dharmō hyasyā na vidyatē |
śrūyatē hi purā śakrō virōcanasutāṁ nr̥pa || 19 ||
pr̥thivīṁ hantumicchantīṁ mantharāmabhyasūdayat |
viṣṇunā ca purā rāma bhr̥gupatnī dr̥ḍhavratā || 20 ||
anindraṁ lōkamicchantī kāvyamātā niṣūditā |
ētairanyaiśca bahubhī rājaputra mahātmabhiḥ || 21 ||
adharmaniratā nāryō hatāḥ puruṣasattamaiḥ |
tasmādēnāṁ ghr̥ṇāṁ tyaktvā jahi macchāsanānnr̥pa || 22 ||
ityārṣē śrīmadrāmāyaṇē vālmīkīyē ādikāvyē bālakāṇḍē pañcaviṁśaḥ sargaḥ || 25 ||
